¤.:‏"‏*.. قال همر قال !! ..*":.¤ بقلمي

،
دخل أحد معارض السيارات وهو منتفخ كالطاووس وقال : يا زول ها الهمر دي بي كم ؟ ..
فأجابه مندوب المبيعات : بي نص مليار ..
قال باستهتار : عليك أمان الله شوف الرخسة دي كيف ، كدي ادني عشرة همرات عقب باقي واحدة دايرا لي براي ، والتانية لأم الأولاد ، والتالته لي ولدي الدكتور البقرا صيدلة في الجامعة الإسلامية في حته بقولو ليها الشقلة الفتيحات ، والرابعة لي بتي الفي الثانوي ، والخامسة يودو بيها ولدي الصغير الروضة حقتو ، وباقيهن حاخليهو إحتياطي باقي زي ماك عارف الظروف مامعروفة يمكن لستك يطق خصوصا الحتمشي الفتيحاب ...
إنطلق فوج الهمرات يشق العاصمة وكأنه موكب رئاسي حتي توقف أمام ناطحة سحاب هائلة ، تحيط بها حديقة غناء بها شتي صنوف النباتات إضافة" لعدد من الصوبات الزجاجية ...
ودخل بيته كالديك الرومي وهو يخاطب زوجته قائلا : هو يا ولية تاني ماتركبي ال BMW‏ الجبتها ليكي الشهر الفات باقي أنا جبت ليكي همر ، وقالو بتشتغل بالستالات ..
قالت له : ودا شنو دا يا راجل الحاجة القلتها دي ؟
ضحك من جهلها وقال : الاقمار الصناعية يا ولية ، يعني قاليكي تركبيها تلقي خريطة السودان قدامك وحتي الشارع الإنتي فيهو حتلقيهو قاعد ...
ثم قال لها : جهزي في الغدا خروف مشوي ومعاهو كم جدادة محمرة لزوم القزقزة ، باقي الدكتور قالي الكروسترول بتاعي زايد ولازم أعمل روجيم ...
قالت له : أنا زاتي دايرة أعمل الرجيم دا ...
ضحك قائلا لها : رجيم شنو يا ولية إنتي قايلاهو شيطان ولا شنو إسمو روجيم ما تفضحينا ...
حضر الغدا فأنقض عليه وجعل الخروف والجداد عظاما ناصعة البياض تصلح ليدرس عليها البياطرة وشرب جردل عصير ونهض وهو غير راضي بهذه الوجبه البسيطة ...
قالت له زوجته في حسرة : يا حليلك زمن كنت بتتغدي بي تلاته خرفان ودستين جداد وتلاته جرادل عصير ، زمن !! ...
قال لها أعمل حساب العشا بعدين ، باقي هيلاري جاية تتعشا معانا هي وراجلا ...
قالت له زوجته في غيظ : هو شنو المره دي ناطالنا كل شوية هي وراجلا ما عندهم أكل هناك ...
قال لها : ومالو يا ولية الخير باسط و....
وسمع تلك الصرخة الهادرة التي كادت تهتك طبلة أدنه والتي كانت صادرة من زوجته : خير ؟!
ومن وين حيجي الخير وإنت نايم لي هنا ،
أصحي يا راجل هوي من نومك وشوف شغلك ، الناس كلها صحت ومشت الشغل إلا إنت نايم لي نصت نهار ..
فتح عينيه وقال : في شنو يا مره ..
قالت له : قوم انبوبه الغاز قطعت ، والكهربا إنتهت و سيد الدكان قال داير حقو ، وبتاع البيت داير الايجار و..و..و..
سالت الدموع من عينيه وهو يعلم أن الدنيا آخر شهر وهو مفلس وادرك أن كل ذالك لم يكن سوي حلم رائع بالثراء والمال وقال لنفسة في سخرية : قال همر قال .....
حقوق الطبع محفوظة للمؤلف والذي هو أنا طبعا ..

هاهاهاهاهاهاهاهاها .. دا كابوس ماحلم .. مشكووور

هههههه موضوع جميل ي دكتور
قالو حلم الجعان عيش بس ده حصل الهمر عدييييييييييييييييييل اكيد احلامه وردية