شوق غيمة --------------------- بقلمي:عبدالقادر الصديق إبراهيم

يظل مكتوب علي بعدك

و يظل مكتوب عليك أقسى

أدس إحساسي في جوفي

عشان أحيا العمر و أنسى

أسافر في بطاحك غيم

بفتش لي الفرح لسه

أزورا بلاد

و أقيف في بلاد

أقاوم الريح

و أزيد في عناد

و لما تبيني في الميعاد

جروفك تبقى لي مرسى



و كل ما الريح تزيد صدك

أخاف من غربتي و بعدك

و أخاف شمسا إذا سطعت

تجف دمعاتي من خدك



و أتوه بين الفضا القاسي

و لا جافيك و لا ناسي

و نتفرق أنا و دمعك

يصب دمعك علي أرضا

تخدر بي عشم وعدك

و ألم قطراتي أرحل ليك

تجيها الريح و تتفتت

أقاوم فيها بي ريدي

تزيد الريح و يتشتت

تطل ذكراك من البال

أطاوع الريح

و في طياتها أتلبت

ألملم فيها في ذاتي

أعاند ليها من تاني

و أنسى أهوال معاناتي

و أنزل في أرض وعدك

أصارع نفسي بي ودك

و ألاقي الدمعة زي عاشقين

فراقهم طال و ليه سنين

لقاهم كان بشوق و حنين

و أسارع ليك نتلاقى

تمر الساعة زي لمحة

و تكون اللمحة سراقة

نتوه في الريدة شفقانين

و دي أصلو الدنيا فراقة

و تشد الريح علي غيمي

أموت في الغربة بي همي

و روحي إليك مشتاقة