يا ليلى ست الشاي --------------- بقلمي: عبدالقادر الصديق إبراهيم

يا ليلى ست الشاي
أنا عندي ليكي كلام
لا قلتو من عرفة
و لا بينا جات أرحام
و ما عندي غرضا فيك
و ما قصدي ليكي غرام
أنا قولي فيك يا أختي
قولا نبع فيني
شان يوصف الحاصل
الشفتو بي عيني
لا قلتو في تسجيل
ولا إتخط بي أقلام
**************
يا ليلى بت الناس
أنا جابني ليك السوق
ما كنت قاصد أجيك
سايق خطاي بالشوق
و لاحتي جابني إليك
ريدا تجيبو بروق
أنا جابني بس الكيف
طالب مزاجي يروق
من زحمة الدنيا
و من كدها الممحوق
**************
و من لحتي في بصري
شكلك وصف حالك
لا بت وزير سابق
و لا اللي الأرض مالك
حالك شبه حالي
تعبان ومتهالك
ما شفنا فيه النور
لا حتى خيط سالك
صابرين علي الدنيا
و عي ظلمها الحالك
**************
و حالك نطق وصَّف
ليك من زمن مدَّة

ما عرفتي درب اللوم
و لا كستي للشحدة

فارقتي درب الذل
من ضل تباري الضل
وشّك حِرِق بالكل
من طولة القعدة

و الصيف لهيبو عصيب
و سَمومو شايحة لهيب
تكوي البعيد و قريب
في الصحية و الرقدة

*************
و في ظني ما جبرك
إلَّا الشديد وقوي
و عشانو ضقتي المر
في نارو تتكوي
ما عرفتي راحة أبد
و ما عشتي تتهوي
ما غشيتي من الزاد
إلَّا عشان تقوي

*************
يا ليلى صبرا ليك
ربك كريم فراج
الرزق هو البدّي
من عندو للمحتاج
و ما ضاقت أبدا يوم
و الخير صبح معدوم
إلا أكيد في يوم
الخير يفيض أمواج
*************
يا ليلى أكيد باكر
جاييكي فارس أحلام
يكفيك من الهم
العشتي فيه أعوام
تتراضي بي حبّو
يهديك شوق و هيام
و لابد يجيك الخير
و يبدد الأوهام
ما أصلو قبل النور
لابد يكون في ظلام
ما أصلو قبل النور
لابد يكون في ظلام