أبجدية زوجية ساخرة .. بقلمي

‏*‏ الزوجة : (أ) : أحبك .. أحبك .. أح..
‏*‏ الزوج مقاطعا إياها : (ب) : بعدين معاكي ! بطلي حركات المراهقين دي .. نحنا كبرنا علي الحاجات دي ..
‏*‏ الزوجة مغيوظة : (ت) : تعبتني معاك ياخي .. أحنكك تزعل .. أطنشك تزعل .. ورني أسويلك شنو ؟ ..
‏*‏ الزوج : (ث) : ثبتي باب الشارع دا معاكي كويس .. مايقوم يجي هوا يقلعو ويخلينا قاعدين في السهلة ساكت .. أنا ماشي السوق ..
‏*‏ الزوجة بصوت عالي : (ج) : جردل الموية البغسل بيهو إنكسر .. جيب معاك واحد ..
‏*‏ الزوج قائلا في غيظ : (ح) : حسبي الله ونعم الوكيل .. ودا الكسرو شنو ؟ .. حاضر حأجيب واحد والعوض علي الله ..
‏*‏ الزوجة بخبث وتشفي وهي تضحك في سرها : (خ) : خلاص .. بالمرة جيب معاك مشابك .. وطشت غسيل .. وصابون بدرة ريحتو سمحة مازي الجبتو لينا المرة الفاتت .. و..و..و..و...إلخ
‏*‏ الزوج بعصبية : (د) : ديييييل كلهن ؟! ليه أصلو دايره تفتحي كشك غسيل ولاشنو ؟!
‏*‏ الزوجة ببرود : (ذ) : ذنبك علي جنبك .. أها أمشي وسخان ..

بعد الغداء .. والجو منعش وسمح

‏*‏ الزوج وهو يغني بمزاج : (ر) : ربي ماتحرم بيت من الأطفال ترررم تررررم ترم آه إمممم ..
‏*‏ الزوجة من المطبخ : (ز) : زي شفعك ديل مابقولو عليهم أطفال .. ديل قرود أو أي حاجة تانية غير الطفولة دي ..
‏*‏ الزوج ضاحكا : (س) : سوو شنو ؟!
‏*‏ الزوجة بغضب : (ش) : شرطو الملايات .. وكسرو عدة الناس ..
‏*‏ الزوج : (ص) : صفقيهم وشلتيهم لامن يعرفو حاجة ..
‏*‏ الزوجة : (ض) : ضربتهم مانفع .. ودقيتهم وعملتليهم أي حاجة ولكن لا حياة لمن تنادي ..
‏*‏ الزوج : (ط) : طيب قومي سوي لي شاي مظبوط بالنعناع .. من إيديكي ..
‏*‏ الزوجة بحنق : (ظ) : ظريف عامل لي فيها نفسك يعني .. بتطول وتاخد مدة .. أبييييت ..
‏*‏ الزوج بخبث : (ع) : عارفك حنينة .. يا رفارف قلبي وشرياني الأورطي وغدتي الصنوبرية زاتا ..
‏*‏ الزوجة في سخرية : (غ) : غايتو حنك ميت زي دا مالاقاني أصلو .. أبييييت أبييييت أبيييت بالتلاته ..
‏*‏ الزوج : (ف) : فاكرة نفسك بتعرفي تحنكي يعني ؟! .. قومي عليك الله شوفي ليكي حلة تنفعك ..
‏*‏ الزوجة بسخرية : (ق) : قصدك شنو يا ابوالطيب المتنبي ؟!
‏*‏ الزوج في غضب : (ك) : كتمت معاي خلاص ..
‏*‏ الزوجة : (ل) : لسع الواطة بدري ماتمينا ونستنا ..
‏*‏ الزوج : (م) : ماعارف .. بس خلاص كتمت معااااااي تب ..
‏*‏ الزوجة : (ن) : نهي زندقي ..
‏*‏ الزوج بغضب : (ه) : هوي يامره أقطعي وشك من قدامي خلاص ..
‏*‏ الزوجة وهي تمد لسانها في سخرية : (و) : وين في السخانة دا ..
‏*‏ الزوج صارخا : (ي) : يازوله ما عذبتيناااااااا ..

تمت بحمد الله