<< بعد 40 سنة زواج >> :
* الزوج (أ) : الفطور بشنو يا مرة ؟! . .
* الزوجة (ب) : باقيلك حيكون شنو يعني سمك ؟! اكيد فول !! . .
* الزوج (ت) : تعرفي للمساخة و طولة اللسان التقول والدنك جوه شجرة قرض . .
* الزوجة (ث) : ثبت الصينية دي كويس بإيدك البتتراجف دي وبطل ظرافة . . ماشه اجيب لي بصلة نطفح بيها الفول دا . .
* الزوج (ج) : جابك بلا يخمك . . اسرعي اسرعي اسرعي . .
* الزوجة (ح) : حاضر يااااخ ما تكورك تقوم تجيك جلطة ولا سكته تشيل باقي عمرك الفاضل ده . .
* الزوج (خ) : خوخه تقلع ضروسك المافيشات ديل . . اسرعي يا مرة انا ماشي اصرف المعاش حقي ده . .
* الزوجة (د) : ده البتفلح فيهو !! . . اصلا معاشك ده علاجاتك ما مكفيها وكان ما القروش البرسلها ولدنا كنت مت معاك بالجوع ساكت . .
* الزوج (ذ) : ذنبي عليكي وانا زاتو فولك الماسورة ده ما دايرو . . انا مشيت . .
<< بدايات الزواج >> :
* الزوجة (ر) : روحي وحياتي عايز شنو في الغداء ؟! إنت تأمر وأنا أنفذ . .
* الزوج (ز) : زيتونة فؤادي وشرياني الأورطي انتي . . أي حاجة تجيبيها حتكون زي العسل . .
* الزوجة (س) : سمح انا حعمل ليك وجبة ما حصلت عشان خاطر عيونك ديل . .
* الزوج (ش) : شكرا و دا من ذوقك الرائع وانا بحمد ربي كتير اني لقيت زوجة زيك . .
* الزوجة (ص) : صلح لمبة البرنده لأنو ضوها ضعيف واعمل حسابك ماعايزاك تاذي نفسك . . وتعال تلقي الغدا جاهز وبعده التحلية كمان . .
* الزوج (ض) : ضوك انتي كفاية . . بس عشان خاطر عيونك حصلح اللمبة . .
* الزوجة (ط) : طيب يا حياتي انا حمشي اسوي الأكل . . ربنا يحفظك لي وما تشوف شر . .
* الزوج (ظ) : ظبطت الإضاءة وكلو حاجة تمام يا روحي . .
* الزوجة (ع) : عشانك بقيت احسن طباخة وحضرتلك احلي غدا . .
<< فترة الخطوبة >> :
* الزوج مستقبلا (غ) : غيرتي حياتي وشقلبتيها رأسا علي عقب من أول ما شفتك . . وبقيت شخص تاني مختلف تماما . .
* الزوجة مستقبلا (ف) : فكري بقيت إنت المسيطر عليهو . .
* الزوج مستقبلا (ق) : قلبي من مايشوفك بدق بسرعة شديدة وبلقي نفسي غرقت في بحر عينيك . .
* الزوجة مستقبلا (ك) : كلماتي بتروح مني أول ما تلاقي عيوني عيونك ولساني بغلبو الكلام . .
* الزوج مستقبلا (ل) : لحدي أمبارح كنت زول بلا احساس بس بعد قابلتك حاسي بإني مليان بالمشاعر السامية النبيلة تجاهك . .
* الزوجة مستقبلا (م) : معاك بشعر بالأمان . . و فيك لقيت كل مواصفات فارس الأحلام . .
* الزوج مستقبلا (ن) : ناوي اقوليك حاجة وياريت ما ترفضي . . عايز اجيب أهلي وأجي اطلبك من ايد اهلك . . انتي موافقة بي كشريك لحياتك ؟ . .
* الزوجة مستقبلا (ه) : هل تسألني ؟ طبعا موافقة (قالتها بإستحياء وخجل) . .
* الزوج مستقبلا (و) : وغلاوتك عندي حأجي الليلة قبل باكر . .
* الزوجة مستقبلا (ي) : ياخ ما تخجلني نحنا راجنكم (وقامت جارية نظام خجلانه وكده) . .
تمت . . ديسمبر 2012 . .
@ @ @ @
- طبعا الحوارات مرتبة أبجديا حسب الأبجدية العربية . .
- احم ليس بالضرورة أن تعبر القصة عن رأي صاحبها ^_^ . .
الإثنين نوفمبر 10, 2014 4:37 pm من طرف 
